Meir jubel i Lierne i helga – no har bygda to lag i Mizunoligaen!
Foto: Lierne Volleyball
Lierne rykka opp til Mizunoligaen
Etter veker med spaning og nerver kunne Lierne endeleg sleppe jubelen laus i helga. Dei trong minst eitt poeng heime mot BTSI i siste runde for å rykke opp, men då kampen starta var det ingen tvil. Lierne vann overlegent 3-0, og er no klare for spel på det aller øverste nivået. Ein utruleg sterk prestasjon av laget som så seint som i førre sesong spelte i regional 2.divisjon. Neste år får vi sjå Mizunoligavolleyball både for herrer og kvinner i Liernehallen, når enda fleire kapittel i eventyret om Lierne Volleyball skal skrivast. NTV og NVBF gratulerer med opprykk! OSI sikra kvalifiseringsplassen ved å slå Rossvoll 3-2 heime i siste runde, og skal møte Tromsø over to runder. For Rossvoll enda det diverre med nedrykk til 2.divisjon. Forutsetningane var tøffe då laget trong sju poeng på tre kampar i helga. Dei kjempa hardt og fekk fire, men det var ikkje nok til å passere fylkesrivalane BTSI og Sotra. Rossvoll slår dermed følgje med Sarpsborg ned i 2.divisjon.
Parade i Trondheim
Dragvollhallen i Trondheim vart det delt ut to gullmedaljar laurdag. Først til herrelaget NTNUI 2 som med 3-0 over BTSI sikra seg seriegullet. NTNUI 2 har no to gull og eitt sølv i dei tre sesongane etter pandemien, og vil vonleg vere ein god leverandør av spelarar til Mizunoligalaget i klubbe. For kvinnene i NTNUI vart siste serierunde ein ny parademarsj med 3-0 over Viking 2. Laget har no oppnådd ein uslåeleg rekord, alle 19 seriekampane vart vunne med 3-0! NTNUI enda dermed med 57 poeng og full pott, og heile 57-0 i settskilnad. Imponerande av studentklubben – NTV og NVBF gratulerer med dobbelt seriemeisterskap og opprykk for kvinnelaget.
I botnen av tabellen enda det med nedrykk for SK Rival etter bortetap mot både Skjetten og OSI. Laget frå Molde måtte dermed nøye seg med ein sesong i nasjonal serie denne gong. BK Tromsø sikra seg sølvmedaljene i kvinneserien, og skal møte Oslo Volley til kvalifiseringskampar, ein sjanse til å revansjere fjorårets bitre nedrykk. BSI tok bronse for kvinner, og Viking 2 tok sølv for menn.PS: I dameserien blei Koll sine bortekampar mot Sandnes og TVN utsett grunna værtilhøva. I tilegg spelast den utsette kampen BSI-Viking 2 i midtveka. Ingen av kampresultata vil påverke opprykk, nedrykk eller medaljar.
Denne teksten er produsert av NTV.